Matseðil má finna inn á heimasíðu Skolamatar með því að velja matseðil.
Skráning fer fram á heimasíðu þeirra, www.skolamatur.is. Bæði er hægt að skrá nemendur í hádegismat sem og ávaxtanesti sem kostar 170 kr á dag.
Skólamatur ehf. er fjölskyldufyrirtæki sem sérhæfir sig í framleiðslu og framreiðslu á ferskum og hollum mat fyrir börn í leik- og grunnskólum.
Fyrirtækið Skólamatur ehf. var stofnað í janúar 2007 en áður hafði Matarlyst ehf. rekið skólamötuneyti sem eina einingu innan fyrirtækisins. Fyrirtækið er í eigu Axels Jónssonar matreiðslumeistara sem hefur áratuga reynslu af alhliða veitingarekstri. Áhugi Axels fór að beinast að heitum skólamáltíðum eftir setu hans í skólanefnd Keflavíkurbæjar 1990. Út frá reynslu sinni þróaði hann viðskiptahugmynd sem varð að veruleika 1999 þegar hann hóf að bjóða börnum í leik- og grunnskólum upp á hollar máltíðir, sérstaklega ætlaðar orkumiklum krökkum sem hafa þörf fyrir næringarríkan mat í erli dagsins. Nú hafa börn Axels tekið við keflinu af föður sínum og reka fyrirtækið Skólamat. Jón Axelsson er forstjóri og Fanný Axelsdóttir er framkvæmdastjóri mannauðs-og markaðssviðs.
Hjá Skólamat starfa um 220 starfsmenn á um 100 starfsstöðvum á suðvesturhorni landsins. Starfsmannavelta fyrirtækisins er lág og starfsaldur hár. Rúmlega helmingur núverandi starfsmanna hefur unnið í fimm ár eða lengur hjá fyrirtækinu. Skólamatur leggur áherslu á að skapa fjölskylduvænt vinnuumhverfi þar sem hæfileikar, þekking og reynsla hvers starfsmanns fær að njóta sín. Áhersla er lögð á símenntun og fræðslu og að starfsmenn fái tækifæri til þess að eflast og þróast í starfi.