news

Kveikt á jólatré á Garðatorgi

30 Nóv 2019

Það var fjölmennt á Garðatorgi laugardaginn 30. nóvember sl. þegar ljósin voru tendruð á jólatrénu sem er staðsett fyrir framan ráðhústurninn.

Dagskráin hófst á ljúfum tónum blásarasveitar Tónlistarskóla Garðabæjar og því næst steig barnakór leikskólans Hæðarbóls á svið. Hilmar Ingólfsson, formaður Norræna félagsins í Garðabæ bauð gesti velkomna.. Aud Lise Norheim, sendiherra Noregs á Íslandi, flutti Garðbæingum góða jólakveðju á íslensku og bað sérstaklega fyrir góðri kveðju frá vinabæ Garðabæjar í Noregi, Asker, sem hefur í gegnum tíðina fært Garðabæ jólatré að gjöf þótt nú sé ný hefð tekin við. Jóna Sæmundsdóttir, varaforseti bæjarstjórnar Garðabæjar, ávarpaði gesti og fékk til liðs við sig þau Agnesi Ynju Magnúsdóttur og Benedikt Einarsson, nemendur úr Urriðaholtsskóla, til að aðstoða við að tendra ljósin á jólatrénu. Börn úr Urriðaholtsskóla fluttu velvalin jólalög fyrir gesti við undirleik Guðbjargar Ragnarsdóttur kennara og að lokum mættu tveir jólasveinar fyrr til byggða og skemmtu viðstöddum með aðstoð barnanna úr skólanum okkar.

Hópurinn stóð sig einstaklega vel og voru sér og sínum til mikils sóma.